Приветствую Вас, Гость
Главная » Статьи » Наши статьи

"Охлопков NEWS" выпуск №2

Күнду Учууталларбытын ис сүрэхтэн эҕэрдэлиибит!

   Кэпсэтиэх ….

Куһуҥҥү киһи күлбүтүнэн

Үөрэх сыла саҕаланыыта  балаҕан ыйын 18 күнүгэр  биһиги оскуолабытыгар   бастакы улахан тэрээһин «Күһүҥҥү бэлэх»  диэн куһуҥҥу быыстапка – ярмарка буолан ааста. Бу сыллата  аайы  ыытыллар. Ол курдук кылаастар икки ардыларыгар   балаһыанньанан  араас туһумэххэ  күрэхтэһэллэр. Бу күн эбиэттэн киэһээ спортивнай залбыт араас дьэрэкээн куһуҥҥу бэлэхтэринэн туолла.  Оҕолор уонна төреппүттэр , кылаас салайааччылар бары кылгас сайыммыт устата үүнэрбит оҕуруот астарын дэлэччи, нэлэччи, хоточчу ууран киэргэттилэр. Уопсайа күрэх 3  туһумэҕинэн ыытылынна. Ол курдук ураты интэриэһинэй көрүҥ – «карвинг». Манна о5олор, төрөппуттэр араастаан о5уруот аһын уонна фруктаны  быһаҕынан быһан киэргэтэн    араас сибэккилэри, оһуордары оҥордулар. Алын кылаастарга 4 «а» кылаас Кыайыы 70 сылыгар анаан кабачоктан, арбузтан уо.д.а  быһан композиция оҥорбуттарын биһирии көрдүбүт уонна кинилэр  кыайыылаах урдук аатын ыллылар.  Улахан кылаастарга 6 «б», 9 «а» кылаас төрөппуттэрэ  арбуһу быһан сибэкки араас көруҥун ойуулаабыттар.  Ол курдук 9 «а» кылаас төрөппутэ ,хаһан да карвинг диэни боруобалаабатах киһи, икки арбуһу атыылаһан түүннэри ойуулаан быспытын кэпсиир.  Оҕотун кылааһа кыайбытыттан олус үөрбүт. Иккис көрүҥ- киэргэтии. Манна 2 «б» кылаас коллектива "Олоҥхо  үс дойдутун”  оҕуруот аһынан киэргэтэн көрдөрбүттэрин кэлбит дьон сөҕө, махтайа көрдө.  Төрөппуттэр сахалыы таҥастаах оҕолорунаан уу сахалыы кэпсээтилэр. Ону тэҥэ сир аһыттан , оҕуруот аһыттан минньигэс астар остуоллары киэргэттилэр. Улахан кылаастарга «В гостях у сказки» 6 «а»,  «Берегите природу» 10 «б» кылаас композициялара мацнайгы миэстэни ыллылар.  Быыстапка5а кылаастар араас остуоруйа дойдутутун геройун, мультик, киинэ тугэннэрин сурдээх учугэйдик тацан, киэргэтэн  оҥорбуттар. Ону тэҥэ оҕолор кылаастарыгар эбии харчы киллэрээри аҕалбыт астарын атыылаатылар. Интэриэһинэй түһүмэҕинэн буолар «Саамай ураты уонна улахан о5уруот аһа».  Манна араас быһыылаахтык үүммут оҕуруот аһын  көрбүппут. Киһи дьиибэргиэх  кып – кыра кабачоктан саҕалаан, элбэх салаалаах моркуопка  , оҕурсуга тиийэ баар.  Сайын устата көрөн- харайан , уу кутан улахан да улахан оҕуруот астарын оҕолор аҕаллылар. 

Бу курдук «куһүнҥү киһи күлбүтүнэн..» диэн туран оскуола быыстапка – ярмарката тумуктэннэ.

6 кылаас юнкордара.

Күһүҥҥү кросс

Балаҕан ыйын 19 күнүгэр Чүүйэҕэ улуус оскуолатын уөрэнээччилэрин күһүҥҥү кросстара буолла. Бу курэх   республика үрдүнэн улахан тэрээһиҥҥэ  ананан ыытылынна .  Кросска улуус 22 оскуолатыттан 216 оҕо кытынна . Күрэхтэһиини кылаабынай судьуйа, спортивнай комплекс директора Илларионов П.А , управление инспектора Брызгалов  үөрүүлээхтик астылар уонна спортсменнары эҕэрдэлээтилэр .  12 чаастан старт бэриллиннэ .  Биһиги оскуолабытыттан Хастаева Лера  4 кылаас-  2 миэстэ ,Филиппов Ганя 6 кылаас -  3 миэстэ буоллулар .  Түмүккэ биһиги оскуолабыт бастаан  кубок хаһаайыттара буоллубут. Иккис миэстэ Майа Ларионов аатынан оскуолата уонна  үһүс миэстэ Төҥүлү оскуолата буолла диэн биллэрдилэр .

Бу кросска кыттыбыт оскуолабыт спортсменнарын , учууталларбытын  Егор Захаровиһы  уонна  Артем Николаевиһы  эҕэрдэлиибит, улахан махталбытын тиэрдэбит .

Бары оҕолор , учууталлар чөл олоҕу тутуһуҥ, доруобай буолуҥ , спорду сэҥээриҥ !

                                                                                                                  Пермякова Сайыына 8 "а” юнкор

 «Болоттор» маладьыастар !

Оскуолабыт иһигэр аан бастаан ВПК  «Болот» - ахсынньы 11 күнүгэр 2013 сыллаахха маҥнайгы күрэхтэһиилэригэр ситиһиилээхтик кыттан, ол күнтэн төрүттэммитэ.  Билиҥҥи кэмҥэ  «Болокко»   11 оҕо баар , уопсайа ВПК-ҕа 40 оҕо сылдьар. "Болот” салайааччыта Эверстов Владимир Семенович. 2013 сылга хамандыырдара Захаров Алексей этэ, онтон кини оскуоланы бүтэрэн барбытын кэннэ   Потапов Стас турбута, билигин да хамаандатын кытта  үрдүккэ талаһар.  "Болот”  ситиһиилэрэ олус элбэх. Кини  улуустаагы ,республикатаагы күрэхтэһиилэргэ кыттан 1-2 миэстэлэри ылбыттара.  Улуустааҕы "СНЕЖНЫЙ БАРС” күрэххэ 1-кы миэстэни ылбыттара, республикаҕа 4 тураллар.

Быйыл биир ый иһигэр элбэх ситиһиилэрдээхтэр: балаҕан ыйын 17-19 куннэригэр Горнай улууһун Аһыыма бөһүөлэгэр 10 Республиканскатаа5ы  "Защитинк Отечества” байыаннай спортивнай онньуулар буолан аастылар.  Ол  күрэххэ бастаан  викторина, иккис автоматы ыһыы уонна хомуйуу. Уолаттарга автоматы ыһыыга уонна хомуйууга саамай тургэн буолбут  – Никитин Радомир. Кыргыттарга – Докторова Анна. Уопсай түмүккэ байыаннай спортивнай оонньууларга биһиги оскуолабыт хамаандата иккис бочуоттаах миэстэни ылбыт.  Оскуола аатыттан улахан эҕэрдэ!!!

ВПК "Болот” хамаандатыгар өссө элбэх ситиһиилэри баҕарабыт!

                                                                                                              Плотникова Юля, Владимирова Аня 8 "а” юнкор

Умсул5ан

Учуутал күнүн көрсө биһиги ЮНКОР-дар үөрэтэр учууталларбытыттан «Тоҕо учуутал идэтин талбыккытый?» диэн боппуруоска эппиэтииллэригэр көрдөспүппүт:

Харитонова Лена Степановна – математика учуутала.  Оҕо эрдэхпиттэн, кыра кылааска үөрэнэ сылдьыахпыттан учуутал буолуохпун баҕарар этим.

Шадрина Валентина Гаврильевна – география учуутала.  Мин бэйэм геолог буолуохпун наһаа баҕарар этим. Аҕам сүбэтинэн географ идэтин талбытым уонна отут сэттэ сылы быһа үөрэтэн бу идэни талбыппыттан олох кэмсиммэппин, оҕолору кытта үлэлиир үчүгэй уонна интэриэһинэй.

Саввина Зинаида Трофимовна – нуучча тылын уонна литературатын учуутала. Ол саҕана учуутал эбэтэр быраас идэтин талыахха сөп этэ. Мин быраас буолуохпун баҕарбатаҕым, онтон толкуйдаан көрбүтүм уонна учуутал идэтин талбытым. Оҕолору таптыыбын, бэйэм идэбин сөбүлүүбүн.  Бу үлэни талбыппыттан кэмсиммэппин, күн ахсын үөрэ-көтө оскуолаҕа кэлэбин.

Филиппова Мария Дмитриевна – омук тылын учуутала.  Учуутал идэтин талыам дии санаабат этим. Үрдүк үөрэҕи бүтэрэн баран учууталлаан көрбүтүм. Үлэбин улам сөбүлээн , оҕолорго омук тылын үөрэтэри интэриэһиргээн испитим.  Мин билигин оҕолорго билиибин биэрэн,   үөрэххэ киирэллэригэр күүс-көмө буоларбыттан  үөрэбин.

 

 8  кылаас юнкордара.

Быыбар түмүктэннэ

Оскуолабытыгар президиэммит быыбара тэрээһиннээхтик ааста.  Кандидаттарынан   Тарская Алиса 9 «а»  уонна Охотин Вова 10 "а” кылаас  активнай үөрэнээччилэрэ турбуттара. Ааспыт понедельниктан саҕалаан учууталларга уонна үөрэнээччилэргэ куоластыылларыгар анаан агитационнай бригадалар тэтимнээхтик улэлээн барбыттара. Ордук оҕолор сэҥээрэ көрбүттэрэ  9 "а” кылаас коллектива Мария Владимировна салайааччылаах Алисаны агитациялаан  эбиэттэн киэһээ мини - концерт тэрийбиттэрин. Кылаас оҕолоро бары сыанаҕа тахсан аныгылыы ырыалары, үҥкүүлэри толорбуттара.

Ол курдук балаҕан ыйын 25 күнүгэр   сарсыардаттан  актовай залга  Олег Сергеевич председателлээх быыбарнай хамыыһыйа үлэтин саҕалаабыта. Уопсайа оскуола үрдунэн     313  киһи быыбардаабыт буоллаҕына, 168 куолаһы ылан  Тарская Алиса оскуола президенэ буолла.  Алисаҕа бу эппиэтинэстээх дуоһунаска ситиһиилэри баҕарабыт уонна  былааннаммыт программатын  оскуола олоҕор киллэриэ диэн эрэнэбит.

Суруналыыстар ыалдьыттаатылар

Биһиги оскуолабытыгар балаҕан ыйын  28 күнүгэр   «Хатан” уонна "Бэлэм буол”  кылаабынай редактордара кэлэн барбыттара. Кинилэр сыалларынан - соруктарынан айар дьоҕурдаах оҕолору кытта билсиһэ, кэпсэтэ, интервью ыла кэлбиттэр.  "Хатан” сурунаал редактора-Егор Николаев  уонна  "Бэлэм буол” редактора- Илья Оконешников 5-8 кылаас о5олорун кытта актовай залга керсүспүттэрэ. Оҕолор  редактордарга интэриэһиргиир боппуруостарын ыйппыттара. Көрсүһүү түмүгэр оскуола юнкордара хаһыат үлэһиттэрин кытта кэпсэппиппит. Быйыл саҥа таһаарбыт "ОхлопковNEWS” диэн хаһыаппытын билиһиннэрдибит уонна куруһуокпут туһунан кэпсээтибит. Редактордар куоракка редакцияларыгар маастар кылаастарга ыҥырбыттара.  Инникитин "Бэлэм буол” хаһыаты кытта дуогабар түһэрсэн ыкса сибээстээхтик үлэлииргэ былааннанныбыт.

Максимова Яна, Скрябина Таня 6 "б" Юнкордар.

Кустук  (айар улэлэр) 

       

Учуутал

Билиини биэрэр

Биһиги учууталбыт.

Быһааран өйдөтөр,

Булларан көрдөрөр.

Итии сыһыаннаах

Ити мин учууталым,

Инники олохпор

Или- эйэни субэлиир.

Эн билии биэрэҥҥин

Элбэххэ үөрэнним.

Эйиэхэ учууталбар

Элбэх махтал этэбин!

 

 Шарина Кира 8 «а» кылаас.

 

Учууталым барахсан                                                              

 

Бала5ан ыйын бастакы кунугэр

Биьиги сибэкки кэьиилээх,

Эйиэхэ суурэн кэлэбит

Эйэ5эс, утуо до5орбутугар.

Дорообото тут, учууталбыт!

Эн эрэ баар буолаҥҥын,

Биьиги уөрэнэр эбиппит.

Эн эрэ кыьаллар буолаҥҥын

Билиибитин кэҥэтэр иһэбит.

 

 

Беляева Яна 6 «Б» кылаас

 

Ахтабын куруутун

Маҥнайгы учууталбын.

Бастакы урокпун

Уруучука тутарбын.

Эн билии биэрбитиҥ,

Улэҕэ үөрэппитиц.

Ийэлии эйэҕэс мичээриҥ

Уйэлэргэ суппэтин!

Үөрэппитиҥ көмөлөһүө,

Инникибин тустүө.

Махтанабын эйиэхэ,

Маҥнайгы учууталбар!

 

 Борисова Азалия  8 «а» кыл


Учуутал идэтин талыам…

Учуутал диэн оҕону арыйааччы киһи буолар дии саныыбын. Кини эйиэхэ билии эрэ биэрэр  буолбатах, кини эн оскуолатааҕы сылларын доҕоро, көмөлөһөөччутэ буолуон сеп.  Арааһынай учууталлар баар буолаллар, ол гынан баран кинилэри куһаҕан – учугэй диэн араарар сыыһа . Кини биһиги көрөрбүтүнэн оҕолору эрэ үөрэтэр  диэн буолбатах, кини эмиэ бэйэтэ туспа олохтоох, дьиэ кэргэннээх, оҕолордоох  уонна доҕоттордоох буолар.  Холобур  биһиги дьиэ кэргэммитигэр дьонум бары учуутал идэлээхтэр.  Ийэм уонна эбэм учууталлар. Кинилэр оҕолору олус сөбүлүүллэр уонна тапсаллар.  Эбэм суурбэттэн тахса сыл саха тылын уонна литературатын учууталынан улэлии сылдьар,  үөрэтэр оҕолорун кытта доҕордуулар. Кини үөрэппит оҕолоро учууталлар, суруналыыстар.  Ийэм уруһуй уонна технология учуутала.  Кини ураты талааннаах киһи. Сатабылын үөорэтэр оҕолоругар биэрэр.  Аҕам – физика учуутала.  Эһэм- физкультуура учуутала.  Бэйэлэрин улэлэрин олус сөбүлүүллэр, бэриниилээхтэр.  Киэһэтин муста түстүбүт да оскуола олоҕун кэпсэтэн барабыт.

Ити курдук , мин дьиэ кэргэним бары учууталлар, эбиитин эдьиийдэрим, убайдарым  бааллар.  Онон, мин эмиэ кинилэри батыһан учуутал буолуохпун баҕарабын.  Учуутал буоларга оҕолору  үөрэппэккин эрэ , кинилэри аан бастаан таптыахха наада дии саныыбын.  Дьиэ кэргэмминэн киэн туттабын!

Плотникова Юля 8 "а” кылаас.

Учууталбар махталым муҥура суох

Маҥнайгы учууталым аата Галина Федоровна. Кини начаальнай кылааска биһигини үөрэппитэ. Кинини аан маҥнай көрөөт, олус сөбүлээбитим, убаастаабытым.  Уруокка тугу эрэ өйдөөбөтөхпутунэ хас биирдиибитигэр чугаһаан, быһааран биэрэрэ.  Учууталым умнуллубат билии биэрбитэ. Мин нуучча тылыгар ыарырҕатар этим, кини көмөтунэн эбиллибитим.  Галина Федоровна ирдэбиллээх этэ. Кини бэрээдэги, таҥаспыт – саппыт ыраас буоларын ирдиирэ. Школьнай формабытын кэппэккэ кэллэхпитинэ 1 баал аччыыр буолара.  Дьиэ улэтин  сурдээхтик бэрэбиэркэлиирэ, ол иһин бары кыһалларбыт. Биһиги кылааспыт араас тэрээһиннэргэ көхтөөхтук кыттара. Ол курдук мин математика олимпиадатыгар ситиһиилээхтик  кыттыбыппын билигин да үчүгэйдик саныыбын.

Учууталбын олус күүскэ  таптыыбын, убаастыыбын, махталым улахан! Учуутал күнүнэн ис сүрэхтэн эҕэрдэлиибин!

Федорова Күннэй 8 «а» кылаас

Категория: Наши статьи | Добавил: МСОШ№2 (13.10.2015)
Просмотров: 99 | Рейтинг: 0.0/0
Добавлять комментарии могут только зарегистрированные пользователи.
[ Регистрация | Вход ]